Handla lokalt!

Av Liv Anne fre 15.10.2021 - 19:30
Med så flott butikk som det er i Eksingedalen er det lett å handla lokalt! Godt utval av varer, stor sørvis og lang opningstid inviterer til handel på nærbutikken.

Laurdag denne veka inviterer Eksingedalen Snarkjøp til "Handle lokalt-dag".

 

Mobile Worker

Loppemarknad i Ljosheim

Av Liv Anne tor 07.10.2021 - 10:23
Husastyret i Ljosheim riggar opp til Loppemarknad laurdag 9.oktober frå kl 11 til 17.
Lopper kan leverast fredag kl 16 - 20, eller etter avtale med husastyret.

Det vert høve til å kjøpa seg laurdagsgraut, vaflar og kaffi i Ljosheim laurdag.

I tillegg er det oppretta SPLEIS til inntekt for stolar i Ljosheim.
Meir info om dette www.spleis.no/grendahusetljosheim
Uni

Ljosheim er fylt med lopper!

Av Liv Anne lør 13.04.2019 - 10:13
Det har vore enorm oppslutning om loppelevering til Ljosheim. Huset er rett og slett stappfullt av lopper av alle slag! Her er varer for einkvar smak: leiker, spel, ski, skøyter, syklar, koppar og kar og mykje flotte klede. Her er alt frå antikvitetar til "dill og dall". Dørene opnar klokka 11.00. Presis!

Frøydis heldt fram som leiar i eit engasjert Bygdaråd!

Av Liv Anne tir 09.04.2019 - 22:46

Årsmøta kjem i rekkje og rad i Eksingedalen i april, og eksingedølane stiller trufaste opp! Tysdag 9.april var det Bygdarådet sin tur. Alle over 16 år med adressa si i Eksingedalen er medlemmar i Bygdarådet, og alle har høve til å påverka saker som Bygdarådet skal jobba med. Arbeidsutvalet la fram ei innhaldsrik årsmelding. Arbeidet omfattar både faste saker som utpeiking av 17.mai-komite, marknadsdag og drift av heimesida, og i tillegg dei meir arbeidskrevjande sakene som ofte tek lang tid.

Det er mange gjennom eit år som legg ned mange dugnadstimar for bygda sitt beste!


Husastyret inviterer til loppemarknad med kafè

Av Liv Anne tir 09.04.2019 - 15:51
Måndag 8.april vart det halde omframt årsmøte for Grendhuset Ljosheim. På årsmøtet i februar vart eit nytt Husastyre valt, men for å komma vidare i arbeid sitt vart årsmøtegodkjente vedtekter og protokollar eit vilkår. Difor kalla det nye Husastyret inn til omframt årsmøte. Møtet vart svært så positivt, der det nye styret viste at dei på få veker allereie har gjennomført mykje. Huset er m.a. vaska og rydda, tilstandsrapport føreligg - og det er planar for kva som trengst gjerast framover.

No treng Ljosheim "friske midlar" - og styret inviterer til loppemarknad palmelaurdag. Der alt overskot går til drift av Ljosheim.

Velkommen på basar!

Av Liv Anne man 01.04.2019 - 18:36
Fredag 5.april inviterer Kvinne- og familielaget til tradisjonell basar i Ljosheim. Det heile startar med eiga barnetrekning, der alle barn er sikra gevinst. Deretter vert det fleire omgongar med åresal - med kaffi og noko attåt innimellom. Til slutt trekking av loddbøkene.

Velkomne til sosial kveld der du òg kan vinna mange fine gevinstar!

Tradisjonar er overlevert!

Av Liv Anne søn 17.03.2019 - 22:23
Tradisjonar er overlevert! Alle kunne prøva og alle fekk øva. Laurdag var "kven som helst" invitert til bakedag i Ljosheim. Kvinne- og familielaget stod bak invitasjonen, og bakgrunnen var målet om å laga ei bok med lokale oppskrifter. Oppslutninga var god, med folk nabobygdene, Voss og frå Bergen i tillegg til Eksingedølar. Etter bakedagen kunne alle kosa seg med eit overdådig kakebord.

Litt tjukke leivar, litt tynne her og der – og innimellom litt hol også. Men, kva gjer vel det ein slik dag? Ingunn hadde kontroll på flatbrødet, Anny på Norlandslefsene og Karin lærte vekk kunsten å baka Nekabrød og smørja Kling. Engsjementet og bakargleda var stor!




Kvinne- og familielaget inviterer til baking og smaking!

Av Liv Anne tir 05.03.2019 - 21:09
Det er sterke mattradisjonar i Eksingedalen. Mange av oppskriftene, historiene og tradisjonane er diverre i ferd med å gå i gløymeboka. Dette vil Kvinne- og familielaget no gjera noko med. Laget er i gang med å samla oppskrifter frå generasjonen vår, mødrene og bestemødrene, med mål om å gje ut ei bok.
Dette markerer laget med å invitera til bakedag i Ljosheim laurdag 16.mars. Og ikkje nok med det: Det vert ettermiddagskafé med smak frå fersk bakst og i tillegg rikeleg med festkaker!
Alle er velkomne til å vera med bakedagen, frå kl 11. Er du mest interessert i å smaka, så kom til kafé frå 15 – 16.30. Det vert garantert mykje godt!