Opninga av toalettet skjedde med snorklipping søndag 19. oktober. Snora var toalettpapir, som vart klipt av leiar i soknerådet i Nesheim sokn, Gøril Kvinge Nesheim. Håkon Øvstedal og Anita Gullbrå assisterte. Solfrid Urke Nese fotograferte. Så heile soknerådet hadde oppgåver under opningsseremonien.
Nytt toalett har stått på ynskjelista til soknerådet i mange år. Så etter fleire rundar, først med å få på plass finansiering og så det praktiske med plassering og utforming, er me endeleg i mål.
Døra inn til toalettet er den til høgre.

Line og Magnus skriv:
Me står i ein prosess å skulle vilja flytta heim att, til Norge, og Modalen med omegn. Me håper på å flytta våren/sommaren 2026. Me vil gjerne byrje med å leige. Det gjer at me er fleksible på kor me bur, berre det går å ta seg til Modalen til arbeid.

Har du eit hus å leige ut? Me er fem i alt når alle er heime, så me treng helst tre soverom eller meir.
Skriv gjerne: slettengline@gmail.com

Glade helsningar frå Line Indvær Sletteng med familie

Kvinne- og familielaget i Eksingedalen har samla inn dåpskjolar og dåpshuer frå bygda. Utstillinga har stått i Ljosheim heile september, og vil ver der eit par veker til.

Størst er samlinga av dåpshuer, som er teke godt vare på. Utstillinga vert ståande i Ljosheim eit par veker til.

Utegudstenester i Beinhelleren har vorte tradisjon i Nesheim sokn. Etter å ha besøkt ein del stølar i soknet med utegudsteneste, har ein dei siste åra brukt Beinhelleren til dette. Her er det kort avstand frå parkering til gudstenesteterrenget. Dette gjer desse gudstenestene tilgjengeleg for mange. Dette året var det i tillegg til majestetisk natur også eit strålande vær.

- Det er godt eg hadde gløymt kor ille det er, sa super-veteran Ragnhild Korneliussen då ho hadde fått pusten att på Mjelkeplassen.

Motbakkeløpet tok 10 minutt og 11 sekund for den som var raskast, trimmarane brukte 20 minutt. 30 deltok denne fine søndagsføremiddagen.

Folk strøymde til - og mange vart verande dei fire-fem timane Eksingedalsmarknaden varte. Alt tyda på at folk kosa seg med at det endeleg var marknad på Lavik att.

Det var sju år sidan sist. Innimellom dette vart marknaden stoppa først av pandemi, deretter brann butikken. Difor var gleda ekstra stor då ein no inviterte til marknad att, med heilt ny butikk. Nett dette var det mange som snakka om.

Sauane Hiri og Herborg må nok ein gong ordna opp. Bonden har bursdag, men det har dei gløymt. Myggen vil øydeleggja for dei, og vêren er vorte trafikkpoliti. Heldigvis er dei verdas beste sauar!

Sauane kjem til marknaden på Lavik, like etter traktorparaden!

Over 200 kom til den offisielle opninga av Yksendalstrappene laurdag 26.juli. Og det er langt fleire enn nokon kunne gjetta på.

Elementa var mange: Godvêr. ordførar, utanriksminister, stappfull parkeringsplass, varmmat med hamburgarar, lokale lammapølser og knallgod lapskaus. Humørfylte og kunnskapsrike talarar, is og drikke frå nærbutikken, feleslåttar, fullt partytelt, ein kvintett av eit stafettlag og ivrige turgåarar. Og framleis full fart i Bygdarådet sitt partytelt då klokka bikka over midnatt, 13 timar etter at programmet starta.

Kjekk opning av Tufteparken tysdag kveld! 45 små og store møtte fram.

Styret i Eksingedalen IL inviterer til offisiell opning av Tufteparkan tysdag 8.juli klokka 19.30!