Eksingedalen IL inviterte til Gygrakjeften Opp søndag føremiddag. 30 stilte på startstreken, 10 av dei i konkurranseklassen. Motbakkeløpet tok 10 minutt og 11 sekund for den som var raskast, trimmarane brukte 20 minutt eller meir. Trimmarane starta først, slik at heiagjengen var på plass til konkurransefolket kom.
- Det er ekstra kjekt at så mange born stilte til start i år, seier Anna, leiar i Eksingedalen IL. Aldersgrensa for konkurransen er ti år, så her er det mange rekruttar framover, legg ho til.
- Det er godt eg hadde gløymt kor ille det er, sa super-veteran Ragnhild Korneliussen då ho hadde fått pusten att på Mjelkeplassen.
Gygrakjeften Opp er god familietradisjon for Ragnhild og niesa Nina Toskedal Simonsen. Dei reiser saman til løp, og har seinare på hausten Vossatur i lag for å handla for gåvekortet dei får i premie. Familieduoen var i år trio, der dotter Signe også stilte på startstreken i konkurranseklassen.
