Eit staseleg 17.mai-tog. Foto: Arne Krumsvik
Mange glade menneske i alle aldrar møtte til 17.maifest på oppvveksttunet. Som alltid starta dagen med tog klokka 12. Og tradisjonen tru song alle både "Ja vi elsker dette landet" og "No livnar det i lundar", med Mari på fiolin som tonefølgje undervegs på turen.
Og treng nokon ein stopp, stoggar heile toget opp!
Så var alle klare att!
Fremst i toget gjekk dei tre eldste elevane, med resten av skulen og barnehagen like bak.
Etter toget var det samling i gymsalen med tale, meir song og god mat. Magnar Nese framførte talen for dagen, som var skrive av Lars Patterson.
Seinare var det leikar, is og brus utandørs. 17.mai-komiteen hadde laga til mange kjekke aktivitetar, og konkurranseiveren var stor. Ikkje minst på 60-meteren, der dei med størst konkurranseinstinkt stilte med joggesko til byte for finskoa.
