Ein nydeleg haustkveld, med himmelen full av stjerner. Det var ramma for konsert i kyrkja på Nesheim. Familien Gullbrå var sentrale aktørar og leia oss gjennom det heile; Frøydis med ord og bilete, Svein med song, Thor Olav med lyd og Jakob med filming. Og, ikkje minst, Hanna med si klokkeklåre røyst, stødig, vakker og varleg.
Det lokale barnekoret sjarmerte med si songglede, før Vossagospel tok over. Vossagospel fylte kyrkja med høg og flott lyd!
- Gospel er til å bli glad av, er det ikkje det? spurte dirigenten Tom Jarle Istad Kristiansen, som med glimt i auga og humor stadig utfordra koret. Som oftast gjekk det som han ville, og songgleda smitta lett over til publikum. Koret framførte gospelmusikk med friske, glade tonar!
Konsert i kyrkja på Nesheim med støtte til skulen Kely Mandresa på Madagaskar, er no ein fin tradisjon. Dette er tredje året med slik konsert, og ei fin oppleving for alle i kyrkjebenkane. Både eksingedølar og tilreisande møtte godt opp.
Og på veg ut av kyrkja kunne ein handla med seg vanilje frå Madagaskar og moltesylte frå Gullbrå. Eksotisk, begge delar.