Året 2025 er " Friluftslivets år", der draumen er at alle skal finna si friluftsglede.
Fleire organisasjonar står saman om å markera Friluftslivets år.
Det viktigaste med Friluftslivets år er å inspirera fleire til å bruka turområda i nærmiljøet, med mål om å finna fram til varige friluftslivsaktivitetar som ein likar der ein bur. Friluftslivets år ynskjer å inspirera til både å oppdaga og ta vare på nærturen, invitera med andre og prøva ut nye aktivitetar.
- Og dette kan skje ved å vera tilstades i naturen, leika, prøva ut og ha det kjekt i eit naturvenleg friluftsliv, heiter det på heimesida til Friluftslivets år.
Startskotet er "Heile Noreg bålar" 18.januar, der ein i bygd og by kan samlast rundt eit bål for samtalar og aktivitetar.
Vaksdal Turlag vil i samarbeid med Eksingedalen IL invitera til bål 18.januar, ein stad i Eksigedalen.
Borna og elevane ved Eksingedalen oppveksttun byrja det nye året med utedag i Almane. Her var det leik og aktivitet, aking, bålkos og fine samtalar. Å samla seg rundt eit bål i Gapahuken, med ein kopp kakao i handa, er stor lukke!
