Strålande sol og blide fjes, slik var det i målområdet på Mjelkeplassen. Iallfall etter at løparane fekk pusten att og saft i magen.

Ein heil gjeng var samla til slutt, 11 i konkurranseklassen, resten var trimmarar.

Det er alltid stas å starte opp att i skule og barnehage i august. Ekstra stas var det for dei tre elevane som starta i første klasse.
Det er 17 år sidan skulen sist har hatt tre elevar i same klasse, så for skulen er dette ekstra kjekt!
Elevtalet aukar på skulen i Eksingedalen.

Eksingedalen IL inviterer på nytt til motbakkeløpet Gygrakjeften opp. Det vert som vanleg både konkurranseklasse og trimklasse.

Set av datoen: 23.august.

No er det komme opp fine skilt over bygda sine informasjonstavler. Tavlene skal fortlja "Kva skjer?" og gje informasjon om "Sal og utleige" i Eksingedalen

Bygdarådet oppmodar alle om å bruka tavlene!

Eksingedalen stiller sterkt når Kong Harald kjem på offisielt besøk onsdag 27.mai. Anna Sveinungsdatter Bergo og Knut Trefall frå Eksingedalen, og Vaksdal sin mest taleføre og kongekyndige, Jørn Øyrehagen Sunde, skal losa Kongen gjennom ei rekkje kulturelle og historiske smakebitar frå kommunen vår.

TAKK TIL RUBEN!

Ruben Sverre Gjertsen gjev seg som kantor i Vaksdal i sommar, etter nærare åtte år hos oss.
Sist søndag spela han til gudsteneste i Nesheim kyrkje for siste gong.
Etter gudstensta kalla Anita Gullbrå frå soknerådet han fram.
Då fekk han eit eksemplar av jubileumsboka frå 2008, med ei fin helsing inni. Og han fekk sjokoladen After Eight, som i fylgje informerte kjelder skal vere ein av hans favorittar.

Kvar 17.mai er det ein person som får tittelen «Årets eksingedøl», for sitt engasjenemt dette året, etter sist 17.mai. Med denne utdelinga ynskjer ein å setja pris på positivt engasjement for bygda.

I år fekk Aud Marit Brønstad Bergo tittelen "Årets Eksingedøl"!

Som vanleg starta feiringa med 17.mai-tog klokka 12. Fremst i toget gjekk heile oppvekstunet, med eldste elev Heidi som flaggberar. Toget vandra etter kasper sitt taktfaste trommespel, i passeleg fart slik at alle kunne følgja med.

Etterpå var det tale, program og mat i gymsalen, deretter leikar og aktivitetar ute.

Årsmøtet i Bygderådet valde nye medlemmar til styret. Dei som er med i styret er:
Einar Hovda Nilsen, Håkon Øvstedal, Britt Eide og Liv Anne Bergo. Liv Anne er det kommande året leiar av Bygderådet.

Styret ynskjer å gje kort informasjon om kva ein jobbar med, undervegs i året, her på Eksingedalen si eiga heimeside. Styret vert også glad for alle som engasjerer seg og har innspel til oppgåver.

Håkon Øvstedal, ung bonde på Nesheim, slo eit slag for unge bønder framfor Stortinget onsdag denne veka. Han heldt appell framfor Stortinget, ved Norges Bondelag sin Bondefrukost.

Bondelaget inviterer årleg til Bondefrukost, i førekant av jordbruksforhanlingane. Politikarar og folk med ulike viktige verv for landbruket vert inviterte, og frukosten er også open for kven som helst.
- Eg vart oppringt av Norges Bondelag sist veke. Dette kunne eg ikkje seia nei til, eg måtte berre reisa bort, smiler Håkon.