Det er eit av dei eldste ungdomshusa i landet me kunne feira lørdagen. Først fekk me litt tilbakeblikk på historia – både til vårt ungdomshus, og til ungdomsrørsla - om kva den kunne innehalde og gi av opplevingar. Det var informative og morosame innlegg både frå leiar i festkomiteen Anna Bergo og festtalar Jørn Øyrehagen Sunde. Det var ikkje før nevnt ymse skodespel, så dukka jammen sketsj-makarane opp. Maya Mykkeltvedt og Magnar Helland fortalte mellom anna humoristisk om den moderne, lettvinte «opp av sekken» bunaden – heilt strykefri og med borrelås for tilpassing. Passande for notidas unge – men neppe særleg populær hjå bunadspolitiet. Til og med fargekodar nederst kunne damene få – for å markere kvar dei måtte vere i livet -lysegrøn for ledig, lilla for gjenbruk og regnboge for fri, og den tradisjonelle mørke for gifte. Noko for ein kvar :-)
Då latteren hadde stilna, kunne folket få nyta festmenyen – med rømmegraut, spekemat og panna cotta til dessert. Nydeleg!
Fleire tok ordet og gratulerte jubilanten, mellom anna ordføraren vår, Hege Eide Vik.
Så var det klart for å reise seg, prate litt, inspisere det fine, restaurerte huset – eller kjøpe seg noko med heimatt. Til dømes ei garnpakke med nydesigna oppskrifter med motiv frå sceneteppet i huset, eller den nyleg utgjevne boka "Drivkraft", med mykje historie og bilete frå dalen.
Ingen bygdefest utan musikk – ei heller denne gongen. Vossa Rebels entra scena og spelte rockabilly til langt på natt – og festlyden svinga seg - og pusta litt -og tok ein ny sving.
Husastyret med dugnadsgjeng har verkeleg gjort ein stor innsats dei siste åra for å få huset restaurert og fint og klar for nye 125 år. Dei same folka har site i festkomite og planlagt kvelden, og flere av dei har også vore sterkt involvert i bokprosjekt og nye strikkedesign. Imonerande!
Det var kjekt å få markere ein så sprek 125-åring, møte gamle kjente, nye kjente og slå av ein prat -eller ein svingom. Ein fin kveld !
